ویلنگٹن (18 اگست 2025) — امیگریشن نیوزی لینڈ نے اعلان کیا ہے کہ اب اسٹوڈنٹ ویزا کی تمام درخواستیں صرف اور صرف ڈیجیٹل پلیٹ فارم کے ذریعے جمع ہوں گی۔ یہ قدم ملک کے امیگریشن سسٹم کو جدید بنانے اور بین الاقوامی طلبہ کے لیے سہولت فراہم کرنے کی ایک بڑی پیش رفت ہے۔
حکام کے مطابق یہ اقدام حکومت کے اس منصوبے کا حصہ ہے جس کے تحت نیوزی لینڈ کی بین الاقوامی تعلیمی مارکیٹ کو 2034 تک دوگنا کرنے کا ہدف مقرر کیا گیا ہے۔
پہلی ویزا کیٹیگری جو مکمل آن لائن منتقل ہوئی
امیگریشن نیوزی لینڈ (INZ) کے مطابق اسٹوڈنٹ ویزا وہ پہلی کیٹیگری ہے جسے مکمل طور پر آن لائن منتقل کر دیا گیا ہے۔ ایجنسی کا کہنا ہے کہ اس کا مقصد ایک ایسا نظام فراہم کرنا ہے جو “قابل اعتماد، تیز اور عالمی معیار کا ہو۔”
یہ تبدیلی INZ کے "فیوچر سروسز پروگرام” کا حصہ ہے، جو طویل مدتی حکمت عملی کے تحت ویزا پروسیسنگ اور کسٹمر سروس کو جدید خطوط پر استوار کر رہا ہے۔
کن ویزا کیٹیگریز پر اطلاق ہوگا؟
18 اگست 2025 سے درج ذیل اسٹوڈنٹ ویزا صرف آن لائن پلیٹ فارم کے ذریعے ہی جمع کیے جائیں گے:
-
انگلش لینگویج اسٹوڈنٹ ویزا
-
ایکسچینج اسٹوڈنٹ ویزا
-
فیس پے کرنے والے طلبہ کا ویزا
-
پاتھ وے اسٹوڈنٹ ویزا
-
نیوزی لینڈ گورنمنٹ اسکالرشپ اسٹوڈنٹ ویزا
-
فارن گورنمنٹ سپورٹڈ اسٹوڈنٹ ویزا
پرانے فارم پر جمع ہونے والی درخواستیں اگر 17 اگست 2025 تک دی گئی ہیں تو ان پر کارروائی جاری رہے گی۔ تاہم پرانے سسٹم میں تیار کیے گئے ڈرافٹ صرف 17 ستمبر 2025 تک جمع کروائے جا سکیں گے، اس کے بعد وہ حذف کر دیے جائیں گے۔
درخواست دہندگان کے لیے ہدایت
امیگریشن نیوزی لینڈ نے خبردار کیا ہے کہ اس وقت اسٹوڈنٹ ویزا کی طلب بہت زیادہ ہے۔ اس لیے درخواست دہندگان کو مشورہ دیا گیا ہے کہ وہ اپنی متوقع سفری تاریخ سے کم از کم تین ماہ پہلے ویزا اپلائی کریں تاکہ تاخیر سے بچا جا سکے۔
بین الاقوامی تعلیم کے لیے فائدہ
ماہرین کے مطابق یہ مکمل ڈیجیٹل نظام نیوزی لینڈ کو مزید پرکشش بنائے گا کیونکہ اس سے کاغذی کارروائی کم ہوگی، درخواستوں کی رفتار بڑھے گی اور طلبہ کے لیے سہولت پیدا ہوگی۔ اس اقدام سے نیوزی لینڈ کی عالمی تعلیمی مارکیٹ میں پوزیشن مزید مضبوط ہونے کی توقع ہے۔
