گڑ اصلی ہے یا نقلی؟ چند آسان طریقے جو ہر خریدار کو معلوم ہونے چاہئیں
گڑ پاکستان کے تقریباً ہر گھر کے کچن میں استعمال ہوتا ہے اور اسے چینی کے مقابلے میں زیادہ صحت بخش سمجھا جاتا ہے۔ حالیہ برسوں میں لوگوں نے چینی چھوڑ کر گڑ والی چائے اور گڑ کے استعمال کو ترجیح دینا شروع کر دی ہے، تاہم بازار میں ملاوٹ شدہ گڑ کی موجودگی صحت کے لیے سنگین خطرہ بن سکتی ہے۔
گڑ کے غذائی فوائد
ماہرینِ غذائیت کے مطابق گڑ میں آئرن، پوٹاشیم، کیلشیم، فاسفورس اور میگنیشیم جیسے اہم معدنی اجزاء پائے جاتے ہیں۔ یہ اینٹی آکسیڈنٹس سے بھرپور ہوتا ہے جو جسم کے مدافعتی نظام کو مضبوط بنانے میں مدد دیتے ہیں۔ گڑ ہاضمہ بہتر کرتا ہے، قبض سے بچاتا ہے اور خون کی کمی دور کرنے میں بھی مؤثر سمجھا جاتا ہے۔
ملاوٹ شدہ گڑ صحت کے لیے نقصان دہ
بازار میں دستیاب بعض گڑ کی اقسام کیمیکل یا دیگر اشیاء کی ملاوٹ سے تیار کی جاتی ہیں۔ ایسے گڑ کا رنگ، خوشبو اور ساخت قدرتی گڑ سے مختلف ہوتی ہے، جبکہ اس کا استعمال صحت کے مسائل پیدا کر سکتا ہے۔
خوشبو سے پہچان کیسے کریں؟
گڑ چونکہ گنے سے تیار ہوتا ہے، اس لیے اصلی گڑ میں گنے کی قدرتی خوشبو ہوتی ہے۔ اگر گڑ میں کیمیکل یا غیر فطری بو محسوس ہو تو اسے استعمال کرنے سے گریز کرنا چاہیے۔
رنگ سے گڑ کی شناخت
اصلی گڑ عام طور پر گہرا بھورا یا سیاہی مائل ہوتا ہے، جبکہ ملاوٹ شدہ گڑ ہلکا پیلا یا غیر معمولی طور پر چمکدار دکھائی دیتا ہے۔ بعض اوقات چونا یا دیگر مادے ملا کر گڑ کو زیادہ خوبصورت بنایا جاتا ہے جو صحت کے لیے نقصان دہ ہو سکتا ہے۔
ہاتھ سے رگڑ کر آزمائیں
گڑ کا ایک چھوٹا ٹکڑا لے کر ہتھیلی پر رگڑیں۔ اصلی گڑ نسبتاً سخت ہوتا ہے اور آسانی سے نہیں ٹوٹتا۔ اگر گڑ نرم، زیادہ چپچپا ہو یا ہتھیلی پر چپک جائے تو یہ ملاوٹ شدہ ہو سکتا ہے۔
پانی کا آسان ٹیسٹ
گڑ کو ایک گلاس پانی میں ڈال کر دیکھیں۔ اصلی گڑ آہستہ آہستہ گھلتا ہے اور پانی میں کوئی گندگی یا ذرات نہیں چھوڑتا۔ جبکہ نقلی گڑ تیزی سے گھل جاتا ہے اور نیچے سفید پاؤڈر یا ریت جیسی تہہ چھوڑ سکتا ہے۔
ذائقہ بھی اہم اشارہ ہے
گڑ خریدنے سے پہلے اگر ممکن ہو تو ایک چھوٹا سا ٹکڑا چکھ لیں۔ اگر ذائقہ کڑوا، نمکین یا غیر فطری ہو تو اس میں کیمیکل یا سوڈا شامل ہو سکتا ہے۔ قدرتی گڑ کا ذائقہ خالص اور گنے جیسا میٹھا ہوتا ہے۔
احتیاط ہی بہترین حل ہے
ماہرین کا کہنا ہے کہ گڑ خریدتے وقت اس کی خوشبو، رنگ، ساخت اور ذائقے کی جانچ ضرور کرنی چاہیے تاکہ صحت کو ممکنہ نقصان سے بچایا جا سکے۔
