اسلام آباد (30 دسمبر 2025):
پاکستان ٹیلی کمیونیکشن اتھارٹی (پی ٹی اے) نے سوشل میڈیا استعمال کرنے والے تمام افراد کو خبردار کیا ہے کہ غیر قانونی، جھوٹا یا نفرت انگیز مواد شیئر کرنے سے گریز کریں۔ پی ٹی اے کے مطابق سوشل میڈیا پر اپنی رائے دینا ہر شہری کا حق ہے، لیکن اس حق کا غلط استعمال کسی صورت برداشت نہیں کیا جائے گا۔
پی ٹی اے کے ترجمان کا کہنا ہے کہ مذہب، مقدس شخصیات یا قومی اداروں کے خلاف توہین آمیز اور اشتعال انگیز مواد قانون کے خلاف ہے۔ اسی طرح جھوٹی خبریں، فحش یا غیر اخلاقی مواد اور نفرت پھیلانے والی پوسٹس بھی جرم کے زمرے میں آتی ہیں۔
اتھارٹی نے واضح کیا ہے کہ ایسے تمام مواد پر نظر رکھی جا رہی ہے اور قانون کی خلاف ورزی کرنے والوں کے خلاف کارروائی کی جا سکتی ہے۔ پی ٹی اے کے مطابق یہ تمام اعمال پیکا ایکٹ 2016 کے تحت قابلِ سزا جرم ہیں۔
پی ٹی اے نے عوام سے اپیل کی ہے کہ اگر انہیں سوشل میڈیا پر کوئی غیر قانونی یا مشکوک مواد نظر آئے تو وہ فوراً PTA CMS موبائل ایپ کے ذریعے اس کی اطلاع دیں تاکہ بروقت کارروائی کی جا سکے۔
ترجمان کے مطابق ذمہ دارانہ سوشل میڈیا استعمال نہ صرف قانون کی پاسداری ہے بلکہ ملک میں امن اور ہم آہنگی برقرار رکھنے میں بھی مددگار ثابت ہوتا ہے۔
