پاکستان کے مایہ ناز بلے باز بابر اعظم نے عالمی ٹی ٹوئنٹی کرکٹ میں ایک اور اہم سنگِ میل عبور کر لیا ہے
آسٹریلیا کی معروف بگ بیش لیگ میں سڈنی سکسرز کی نمائندگی کرتے ہوئے بابر اعظم نے انگلینڈ کے وکٹ کیپر بیٹر جوز بٹلر کا ٹی ٹوئنٹی نصف سنچریوں کا ریکارڈ برابر کر دیا ہے
یہ اعزاز بابر اعظم نے سڈنی سکسرز اور میلبرن رینیگیڈز کے درمیان کھیلے گئے میچ میں شاندار نصف سنچری اسکور کر کے حاصل کیا
ذرائع کے مطابق اس میچ میں میلبرن رینیگیڈز نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 164 رنز بنائے
ہدف کے تعاقب میں بابر اعظم نے ذمہ دارانہ اور پراعتماد بیٹنگ کا مظاہرہ کرتے ہوئے 46 گیندوں پر 58 رنز کی ناقابلِ شکست میچ وننگ اننگز کھیلی
ان کی اننگز میں چار چوکے اور ایک چھکا شامل تھا
بابر اعظم کی اس شاندار کارکردگی کی بدولت سڈنی سکسرز نے مطلوبہ ہدف 19.1 اوورز میں باآسانی حاصل کر لیا
اس نصف سنچری کے ساتھ بابر اعظم کے ٹی ٹوئنٹی کیریئر میں نصف سنچریوں کی تعداد 97 ہو گئی
یوں انہوں نے انگلینڈ کے معروف بلے باز جوز بٹلر کے ریکارڈ کی برابری کر لی
اعداد و شمار کے مطابق بابر اعظم نے یہ اعزاز اپنے 333ویں ٹی ٹوئنٹی میچ میں حاصل کیا جبکہ جوز بٹلر نے 97 نصف سنچریاں 476 میچز میں مکمل کی تھیں
بابر اعظم اب تک ٹی ٹوئنٹی کرکٹ میں 11 سنچریاں بھی اسکور کر چکے ہیں جو ان کی مستقل مزاجی اور بڑی اننگز کھیلنے کی صلاحیت کو ظاہر کرتا ہے
واضح رہے کہ ٹی ٹوئنٹی کرکٹ میں سب سے زیادہ نصف سنچریاں بنانے کا ریکارڈ آسٹریلیا کے ڈیوڈ وارنر کے پاس ہے جبکہ بھارت کے ویرات کوہلی اس فہرست میں دوسرے نمبر پر موجود ہیں
بگ بیش لیگ کے موجودہ سیزن میں یہ بابر اعظم کی دوسری نصف سنچری ہے جو آسٹریلوی کنڈیشنز میں ان کی کامیاب بیٹنگ کا ثبوت ہے
ماہرین کے مطابق اگر بابر اعظم اسی تسلسل کے ساتھ کارکردگی دکھاتے رہے تو وہ مستقبل قریب میں مزید بڑے عالمی ریکارڈز اپنے نام کر سکتے ہیں
