بھارتی کرکٹ ٹیم کے مایہ ناز بیٹر ویرات کوہلی نے انٹرنیشنل کرکٹ میں ایک اور بڑا ریکارڈ اپنے نام کر لیا ہے۔ نیوزی لینڈ کے خلاف ایک روزہ سیریز کے پہلے میچ میں شاندار بیٹنگ کرتے ہوئے انہوں نے سری لنکا کے سابق کپتان کمار سنگاکارا کو پیچھے چھوڑ دیا۔
وڈودارا میں کھیلے گئے سیریز کے پہلے میچ میں نیوزی لینڈ نے پہلے بیٹنگ کرتے ہوئے بھارت کو جیت کے لیے 301 رنز کا ہدف دیا تھا۔ بھارت نے مطلوبہ ہدف چار وکٹوں کے نقصان پر حاصل کر لیا اور میچ میں شاندار کارکردگی پر ویرات کوہلی کو مین آف دی میچ قرار دیا گیا۔
ویرات کوہلی نے اس میچ میں 91 گیندوں پر 93 رنز کی ذمہ دارانہ اننگز کھیلی، جس میں آٹھ چوکے اور ایک چھکا شامل تھا۔ اس اننگز کے دوران انہوں نے انٹرنیشنل کرکٹ میں سب سے زیادہ رنز بنانے والے بیٹرز کی فہرست میں اہم پیش رفت حاصل کی۔
نیوزی لینڈ کے خلاف اس میچ سے قبل ویرات کوہلی 27 ہزار 975 رنز کے ساتھ انٹرنیشنل کرکٹ میں سب سے زیادہ رنز بنانے والے بیٹرز میں تیسرے نمبر پر موجود تھے، تاہم 93 رنز کی اننگز کے بعد وہ دوسرے نمبر پر پہنچ گئے ہیں۔
انٹرنیشنل کرکٹ میں سب سے زیادہ رنز بنانے کا اعزاز بدستور سچن ٹنڈولکر کے پاس ہے، جنہوں نے ٹیسٹ، ون ڈے اور ٹی ٹوئنٹی کرکٹ میں مجموعی طور پر 34 ہزار 357 رنز اسکور کیے ہیں۔
ویرات کوہلی اب 28 ہزار 68 رنز کے ساتھ دوسرے نمبر پر براجمان ہو گئے ہیں، جبکہ کمار سنگاکارا 28 ہزار 16 رنز کے ساتھ تیسرے نمبر پر چلے گئے ہیں۔
اس فہرست میں آسٹریلیا کے سابق کپتان رکی پونٹنگ 27 ہزار 483 رنز کے ساتھ چوتھے جبکہ سری لنکا کے مہیلا جے وردھنے 25 ہزار 957 رنز کے ساتھ پانچویں نمبر پر موجود ہیں۔
مزید برآں ویرات کوہلی کے ون ڈے کرکٹ میں مین آف دی میچ ایوارڈز کی تعداد بھی بڑھ کر 45 ہو گئی ہے، جس سے وہ اس فہرست میں بھی سرفہرست کھلاڑیوں کے قریب پہنچتے جا رہے ہیں۔
کرکٹ ماہرین کے مطابق ویرات کوہلی کی مسلسل کارکردگی انہیں جدید دور کے عظیم بیٹرز میں شامل کرتی ہے اور آنے والے میچز میں ان سے مزید ریکارڈز کی توقع کی جا رہی ہے۔
