پاکستان کے دورے پر موجود آسٹریلوی کرکٹ ٹیم کے کپتان مچل مارش نے اعتراف کیا ہے کہ انہیں پاکستان میں اس قدر سرد موسم کی توقع نہیں تھی، جس کے باعث وہ مناسب گرم کپڑے ساتھ نہیں لا سکے۔
پاکستان اور آسٹریلیا کے درمیان تین میچوں پر مشتمل ٹی ٹوئنٹی سیریز 29 جنوری سے یکم فروری تک قذافی اسٹیڈیم لاہور میں کھیلی جائے گی، جو دونوں ٹیموں کے لیے آئی سی سی مینز ٹی ٹوئنٹی ورلڈ کپ 2026 سے قبل تیاری کا اہم موقع تصور کی جا رہی ہے۔
لاہور پہنچنے کے بعد پریس کانفرنس سے گفتگو کرتے ہوئے آسٹریلوی کپتان مچل مارش نے سیریز کے حوالے سے اعتماد کا اظہار کرتے ہوئے کہا کہ ان کی ٹیم پاکستان کے خلاف مقابلوں کے لیے پوری طرح تیار ہے۔
انہوں نے بتایا کہ آسٹریلوی اسکواڈ کے بیشتر کھلاڑی گزشتہ چار دنوں سے دبئی میں ٹریننگ کر رہے تھے، جہاں ٹیم نے اکٹھے وقت گزارا اور تیاریوں کو حتمی شکل دی۔
مچل مارش کے مطابق بگ بیش لیگ کی مصروفیات کے باعث کچھ کھلاڑی نسبتاً دیر سے ٹیم کو جوائن کر سکے، تاہم اس کے باوجود ٹیم کی مجموعی تیاری متاثر نہیں ہوئی۔
آسٹریلوی کپتان نے واضح کیا کہ ورک لوڈ مینجمنٹ کے تحت پیٹ کمنز، ٹم ڈیوڈ، جوش ہیزل ووڈ اور گلین میکسویل اس سیریز کا حصہ نہیں ہوں گے، تاہم یہ کھلاڑی ورلڈ کپ سے قبل اسکواڈ کو جوائن کرنے کے لیے تیار ہیں۔
مچل مارش نے پاکستان کے موسم پر تبصرہ کرتے ہوئے کہا کہ انہیں اندازہ نہیں تھا کہ یہاں سردی اتنی زیادہ ہوگی۔
انہوں نے مسکراتے ہوئے اعتراف کیا کہ وہ زیادہ گرم کپڑے پیک نہیں کر سکے اور آئندہ پاکستان آنے سے قبل اس بات کو ضرور ذہن میں رکھیں گے۔
ان کا کہنا تھا کہ موسمی حالات کے باوجود وہ ایک سنسنی خیز اور مسابقتی سیریز کے منتظر ہیں۔
