پاکستان کرکٹ ٹیم آئی سی سی ٹی ٹوئنٹی ورلڈکپ میں شرکت کے لیے لاہور سے روانہ ہو کر کولمبو پہنچ گئی ہے۔ قومی ٹیم کی سری لنکا آمد پر ورلڈکپ کی تیاریاں باضابطہ طور پر شروع ہو گئی ہیں۔
ذرائع کے مطابق پاکستان ٹیم کل آرام کرے گی جبکہ 4 فروری کو پاکستان اور آئرلینڈ کرکٹ ٹیم کے درمیان وارم اپ میچ کھیلا جائے گا، جس میں کھلاڑیوں کو کنڈیشنز سے ہم آہنگ ہونے کا موقع ملے گا۔
واضح رہے کہ آئی سی سی ٹی ٹوئنٹی ورلڈکپ 2026 کا آغاز 7 فروری سے ہو رہا ہے جو 8 مارچ تک بھارت اور سری لنکا میں کھیلا جائے گا۔ پاکستان کو گروپ اے میں شامل کیا گیا ہے جہاں اس کے ساتھ بھارت، نمیبیا، نیدرلینڈز اور امریکا شامل ہیں۔
قومی ٹیم ٹی ٹوئنٹی ورلڈکپ میں اپنی مہم کا آغاز 7 فروری کو نیدرلینڈز کرکٹ ٹیم کے خلاف میچ سے کرے گی، جبکہ دوسرا میچ 10 فروری کو امریکا کرکٹ ٹیم کے خلاف شیڈول ہے۔
پاکستان کا تیسرا میچ 15 فروری کو بھارت کے خلاف طے تھا، تاہم حکومتی فیصلے کے بعد قومی ٹیم اس میچ میں شرکت نہیں کرے گی۔ گروپ اے میں پاکستان اپنا آخری میچ 18 فروری کو نمیبیا کرکٹ ٹیم کے خلاف کھیلے گی۔
