اسلام آباد:
مشہور ٹک ٹاکرز رجب بٹ اور ندیم نانی والا نے اپنے نام سفری پابندی کی فہرست سے نکالنے کے لیے اسلام آباد ہائیکورٹ سے رجوع کر لیا ہے۔
تفصیلات کے مطابق دونوں ٹک ٹاکرز کی جانب سے عدالت میں باقاعدہ درخواستیں دائر کی گئی ہیں، جن میں مؤقف اختیار کیا گیا ہے کہ ان کے نام سفری پابندی کی فہرست میں شامل کیے جانے سے ان کے بنیادی حقوق متاثر ہو رہے ہیں، اس لیے یہ پابندی ختم کی جائے۔
درخواستیں وکلاء بیرسٹر راجہ قدیر جنجوعہ اور احد کھوکھر کے توسط سے دائر کی گئیں، جن میں فیڈرل انویسٹی گیشن ایجنسی، سیکرٹری داخلہ اور دیگر متعلقہ حکام کو فریق بنایا گیا ہے۔
درخواست گزاروں کی جانب سے استدعا کی گئی ہے کہ عدالت انہیں بیرونِ ملک سفر کی اجازت دے اور ان کے نام فوری طور پر سفری پابندی کی فہرست سے خارج کرنے کا حکم جاری کرے۔
قانونی ماہرین کے مطابق عدالت آئندہ سماعت میں فریقین کے دلائل سننے کے بعد اس معاملے پر فیصلہ کرے گی۔ سوشل میڈیا پر بھی اس پیش رفت کو خاصی توجہ حاصل ہو رہی ہے، جہاں صارفین مختلف آرا کا اظہار کر رہے ہیں۔
