تحریک انصاف کے چیئرمین عمران خان کی ہمشیرہ علیمہ خانم کا کہنا ہے کہ بانی پی ٹی آئی کے خلاف تمام مقدمات بے بنیاد ہیں اگر انصاف ملا تو رہائی ممکن ہے۔
انسداد دہشت گردی عدالت راولپنڈی کے باہر میڈیا سے گفتگو کرتے ہوئے علیمہ خانم نے کہا کہ ہمارا مؤقف صرف عمران خان کے حقوق کی بحالی ہے اپنی ملاقاتوں کا نہیں، بانی کی صحت، علاج اور تمام حقوق کی فراہمی اولین ترجیح ہے۔
انہوں نے کہا کہ اڈیالہ جیل میں عمران خان کے بنیادی حقوق کی خلاف ورزی ہورہی ہے، ہفتہ وار 18 افراد کی ملاقات کا عدالتی حکم ہے لیکن عملدرآمد نہیں ہورہا ہے۔ بانی کو بچوں سے باقاعدہ بات اور کتابیں دینے کی اجازت دی جائے۔
علیمہ خانم کا کہنا تھا کہ بھائی سے ملاقات کروانا کوئی احسان نہیں ہے، یہ بانی پی ٹی آئی کا قانونی اور آئینی حق ہے، ایک ملاقات کرواکر پھر مہینوں تک پابندی لگانا کسی صورت قبول نہیں، عوام اور پارٹی عمران خان کے حقوق کی بحالی کے لیے بھرپور آواز بلند کریں۔
انہوں نے کہا کہ جنید اکبر کو تحریک اور تنظیم سازی سے متعلق پیغامات دیے جاچکے ہیں، عمران خان نے جنید اکبر کو پی اے سی سے مستعفی ہوکر تنظیم سازی کا کہا تھا، جنید اکبر گزشتہ ایک سال سے خیبرپختنخوا میں تنظیم سازی میں مصروف ہیں۔
