پشاور (3 جولائی 2026): خیبر پختونخوا حکومت، محکمہ ٹرانسپورٹ، KPITB اور دَستک ڈیجیٹل پلیٹ فارم کے اشتراک سے الیکٹرانک ڈرائیونگ لائسنس متعارف کر دیا گیا۔
وزیر اعلیٰ کے پی سہیل آفریدی کے فیس بک اکاؤنٹ سے شیئر کی گئی ایک پوسٹ کے مطابق بانی چیئرمین پی ٹی آئی عمران خان کے ڈیجیٹل پاکستان کے وژن کے تحت عوام کو جدید، شفاف اور آسان سرکاری خدمات کی فراہمی کا ایک اور اہم سنگ میل عبور کر لیا گیا۔
پوسٹ کے مطابق صوبائی حکومت نے الیکٹرانک ڈرائیونگ لائسنس کی سہولت متعارف کروا دی، جس کے مطابق اب آپ کا ڈرائیونگ لائسنس ہر وقت آپ کے موبائل میں دستیاب ہوگا۔
الیکٹرانک ڈرائیونگ لائسنس پولیس، سرکاری اداروں اور عدالتوں میں مکمل طور پر قابل قبول ہوگا، جس کی محفوظ کیو آر کوڈ کے ذریعے چند سیکنڈ میں آن لائن تصدیق ہو سکے گی۔
اس سے جعل سازی اور ردوبدل سے مؤثر تحفظ ملے گا، جبکہ فزیکل لائسنس ساتھ رکھنے کی ضرورت نہیں رہے گی۔
